Textauszug

„Adi gusch!“

Purdi auf der Suche nach Gläsern, in denen ein Rest Alkohol verblieben ist. Er wird nur aus solchen Gläsern trinken.

Spielt mit der Mundharmonika vor. Singt.           

                        Tot bin ich wie ein Pirat
                        auf dem Meeresgrunde
                        Lange schon geschlagen hat
                        mir die letzte Stunde ...

Spielt mit der Mundharmonika nach.
Greift nach einem Glas.

Owi mid dia, Lackerl!

Trinkt.

Normalaweis sauf i kani Noagln aus, i nid ... na wirkli nid, des hod ein Purdi nicht nedig. Es is nua, wia soi i sogn, es is wegn da Söönvawaundschoft zwischn so an Noagl und mia: olle zwa samma Iiwrichbliewane, des Noagl und i, mid dem Untaschied, daß dei Schicksoi, Noagl hiamid besiegld is ... Lacht unverhohlen. Trinkt. Greift nach einem andern Glas. ... Imma, waun di Leber mid ian Löwngebrüll aunsetzd, daunn wirds Zeid. Vüü z´vüü Restln, di wos unerledichd san. Oiso erledich mas, is jo schod zum Wegschittn. Brunz mas liawa aus!

Lacht. Trinkt. Wischt sich über den Mund.     

Jetzt gaunz im Eanst. Des mid di Noagln, des is a so: wie sie mi ins Loch hinein vasenkt hom, oiso wia i des Bankl grissn hob, auf guad Deitsch, des woa so im 79er Joa, do woa iagandwia des Leben für mi ... ooglebt, meinasöö, ooglebt. Und trotzdem: du liegst im Soag drin, du merkst, jetzd ziagn´s di Höözl weg unta dia, jetzd faungt dea Soag auf di Strick zu schwebm aun ... und es geht owi, es schwebd schen laungsaum owe in di Ewichkeid, di wos nix aundas is ois wia a Loch im Lahm ... owa mid an Bodn, weu auf dem Bodn da Ewichkeid kummt no a jede Kistn zum Stehn, und daunn oiso spiast an Ruck, an hauchfeinan klanan Ruck, daweuln da Ausschnid vom Himmü iwa dia imma klana wiad ... i frog mi, wia san di Leid jemois auf di Idee kumman, es gabat an Himmü und dea warat iwa da Birn des homo erectus driwa. I kaun eich nua sogn - und glaubts an hinnichn Zigeina: es gibd kan Himmü nid, es gibd nua an festn Grund drunt im Loch, und des is da letzde, owa da ollaletzde Grund, auf dem des menschliche Gfrast zu stehn kummt, sozusogn auf gleicha Ebene mid da ollairdischesten Parasiterei, de si aun deinadurchlauchtig oodaunktn Fleischlichkeit gütlich hoidn wiad. Duatn, meine Hochvaehrtestn, duatn is vo an Himmü nid amoi mea di Idee iwarich. Da Himmü, glaubts mia Leidl, weu i waas des, i, da Purdi, hob des ollas mid di eiganen Augn gesichtet, da Himmü ist ein Luxus des Lebens, nicht des Todes. So laungst lebst, kaunnst da an Himmü leistn, danoch kaunnst nua no koartndibbln mid di Wiiam! Und glaub jo nid, daßd do no an Stich mochst, vom Wurme kommst du ... waun da Papa des Zipferl in di Mama steckt ... zum Wurme wirst du, aa waunn di hohe Philosophie und di no hehare religiöse Heitakeid diesen Zuastaund irrtümlichaweise ois Leben mißvastehn tuan, ois soichem di göttliche Weihung erteiln und vo da SS in Birkenau exekutiern lossn ... und zum Wurme gehst du in alle Ewigkeit, weu da Herrgod is da Wurm und ea sprichd des letzte Uateu iwa di: am End des gewoitign Verdauungsschlauchs, dea wos si Lebn nennt, wiast nix sein ois woa das ultimativ Ausgschissane, Amen.